Hai char su andhera, pur dard si fiza hai
Kuchh log ro rahe hain, ek shor sa bapa hai

Phir maut ne kisi ki, duniya tabah ki hai
Phir aaj koi kashti, manjhdhar men phasi hai

Phir aaj kuchh dilon men, nashtar utar gaya hai
Phir aaj koi gulshan, toonfan se ghira hai

Fasle bahar thi jab, dala khizan ne dera
Tareek sari raten, benoor har sawera

Gulshan ki shadmani, aakar khizan ne looti
Kumhlaye sabz patte, dali gulon ki tooti

Ye  maut ka farishta, aata hi kyon hai aakhir
Bhate nahin hain shayad, isko hasin manazir

Takleefdeh hai lekin, hai maut ek haqeeqat
Har dil ko jhelna hai, is dard ki azeeyat

Har shaqs janta hai, hai maut sabki manzil
Rah jayegi yahin par, ye raunaqen ye mahfil

Lekin ajab hai duniya, be-fikr be-khabar hai
Ek be-hisi hai jispar, har khauf be-asar hai