Rat ko khwab men aksar mere aata hai koi

Meri palkon ko sitaron se sajata hai koi

Pyar se hath mera hath men apne lekar

Meri ankhon ko naye rang dikhata hai koi

Mujhko lagta hai kisi aur hi duniya se bhatak

Wo chala aaya hai is duniya men bas mere  liye

Jo mujhko ranjhen aur majnu se siwa chahega

Jalayega meri ankhon men mohabbat ke diye

Wo pas aake mere jab bhi baithta hai kabhi

Main sochti hun ke bas waqt thahar jaye yahin

Ab uske pas  mujhe maut bhi aa jaye agar

Main has ke chhor dun uske liye duniya- o- zamin

Ajab sa noor hai uski zaheen ankhon men

Bahut hi pak se jazbon ka rang shamil hai

Kahin na tootne paye main sahem jati hun

Ye khwab hi to meri zindagi ka hasil hai

Nahin wo koi haseenon ke desh ka raja

Magar hai shaqsiyat uski juda- juda sab se

Aye  kash din ke ujalon men bhi wo mil jaye

Main manga kartin hun aksar yahi dua rab se

Mile ho tum to mujhe aaj ye yaqin hua

Ki tum hi ho mere us khwab ki haseen taabeer

Hai wo hi soch wo andaz wo zaheen ankhen

Thi mere dil men basi wo tumhari hi tasweer